Do werns wieda bled schaung in Inglstodt drin! Etz hom mia Pfahofara heit den nächsten großn Preis gwunna. De oanzig großn Preise, de wo du in Inglstodt siegst, des san de von de Wohnungen und Bauplätz. I muaß oba ehrlich song, i hob a zerscht gmoant, da Herker, da Scholz und da Prechter fahrn bloß wega de Kneipn nach Düsseldorf nauf, oba etz samma tatsächlich Sieger. Zerscht sau-lebenswert und etz a no total nachhaltig, Pfahofa is scho supa! I hob ja lang überlegt, warum des etz so aufwärts geht mit dera Stodt. Und dann bin i endlich draufkumma: Seit de vor gut zwoa Jahr de Einfahrt von der Sparkassen-Tiefgarage zur Ausfahrt g'macht hom und umgekehrt, seitdem lafts einfach. Do siegst a mal, wia ma Probleme löst.